Princips da cumportament da la compliance
Nus, la SGIC e sias interpresas commembras, n’ans cuntentain betg cun reglaments e l’organisaziun, mabain ans stentain intensivamain da far lavur da sensibilisaziun e da tgirar nossa cultura. Perquai avain nus decidì in program da compliance da plirs onns.
Nus resguardain las directivas da la compliance che n’èn per nus betg mo in’opziun, mabain in’obligaziun. La societad ha examinà en lavuratoris, seminaris e scolaziuns tut ils process e documents davart la compliance e dat vinavant sia savida en furma da curs e seminaris. En cas da dumondas stat il secretariat gugent a disposiziun.
Dretg dals cartels
Nus resguardain las directivas relevantas dal dretg da concurrenza.
Nus n’ans participain betg a cunvegnas e cumportaments che pudessan restrenscher la concurrenza, quai vala surtut per cunvegnas davart pretschs, quantitads, cundiziuns e la repartiziun dal martgà cun concurrents.
En cas da contacts cun concurrents e partenaris da fatschenta na discurrin nus e noss collavuraturs betg davart chaussas internas, sco p.ex. publicaziuns, pretschs, custs, survistas dal martgà u davart autras infurmaziuns da fatschenta confidenzialas che pudessan avantagiar ils concurrents u partenaris da fatschenta u che pudessan dischavantagiar la concurrenza sin fundament dal barat d’infurmaziuns.
Protecziun da datas
Nus resguardain la lescha davart la protecziun da datas cun rimnar datas persunalas unicamain per las elavurar e nizzegiar en il rom da las prescripziuns legalas.
Documents che cuntegnan datas persunalas davart nossas collavuraturas e noss collavuraturs, datas betg publicas, sco era documents davart noss clients u furniturs tractain nus a moda confidenziala. Nus als tegnain en salv premurusamain ed als mussain mo a persunas autorisadas. Ultra da quai protegin nus ils documents a moda adequata da l’invista tras terzs e tras collavuraturas e collavuraturs betg involvids.
Datas persunalas rimnain, elavurain u nizzegiain nus unicamain en cas da basegn ed a basa da las prescripziuns legalas u d’ina lubientscha correspundenta. L’utilisaziun da las datas sto esser transparenta per las persunas pertutgadas. Per l’elavuraziun da datas tras interpresas da servetschs externas valan las medemas cundiziuns. Il dretg d’obtegnair infurmaziuns, il dretg da far correcturas, il dretg da far opposiziun ed il dretg d’annullar las datas ston vegnir resguardads.
Corrupziun
Nus na tolerain nagina corrupziun u autras praticas da fatschenta illoialas.
Nus n’offrin nagins stimuls, privilegis u favurs che influenzeschan decisiuns da fatschenta objectivas e gistas.
Regals, tschaveras da fatschenta, occurrenzas d’infurmaziun, da represchentaziun u da divertiment pon esser in med legitim per promover e sustegnair relaziuns da fatschenta. Els na dastgan però mai vegnir utilisads per profitar d’avantatgs illoials. Ultra da quai ston els resguardar ina dimensiun ed ina moda e maniera che na metta betg en dumonda l’independenza ed il giudizi dals participads.
Particularmain precaut èsi dad esser en contact cun titularas e titulars d’in uffizi. Qua èsi da resguardar las reglas da regals e d’invits dal patrun respectiv.
Donaziuns e sponsuradis
Era donaziuns e sponsuradis pon influenzar decisiuns. Els na dastgan perquai betg vegnir utilisads per profitar d’avantatgs illoials dals partenaris da fatschenta.
Ulteriurs secturs da la compliance
Furniturs
Noss partenaris da fatschenta rendain nus attent a noss princips da cumportament e spetgain ch’els orienteschian lur activitad da fatschenta tenor quels.
Finanzas e taglias
Nus essan conscients da nossa responsabladad sociala ed ademplin las obligaziuns finanzialas e fiscalas.
Lavada da daners suspectus
Nus prendain tut las mesiras legalas necessarias per impedir en noss champ d’influenza la lavada da daners suspectus. En cas da suspect contactain nus il secretariat da la SGIC.
Protecziun da lavur e da la sanadad
Cun ina protecziun da lavur consequenta e preventiva sin ils plazzals evitain nus da metter en privel persunas e sustegnain lur sanadad cun porscher bunas cundiziuns da lavur.
Protecziun da l’ambient
Nus resguardain ils princips da l’economia persistenta e da la protecziun da l’ambient sco valurs d’interpresa.
Funcziun d’exempel – scolaziuns
Nus tuts essan responsabels da resguardar las directivas da la compliance, ma nus pudain era nominar ina persuna da contact entaifer l’interpresa ch’è cumpetenta en dumondas da la compliance. Nus avain ina funcziun d’exempel e resguardain ils princips da cumportament visavi nossas collavuraturas e noss collavuraturs, noss persunal dal cader e da la direcziun.
Nus ans scolain vinavant sistematicamain e faschain diever dals fegls d’infurmaziun, da las scolaziuns e dals referats offerts en connex cun la compliance. En il rapport annual è visibel il status dal program da la compliance (ristgas, eveniments, scolaziuns, occurrenzas, participaziun e perspectiva).
Consequenzas
En cas d’in surpassament dals princips da cumportament ans suttamettain nus a las consequenzas disciplinaras determinadas en ils statuts.
Nus essan conscients che surpassaments da la compliance pon avair consequenzas dal dretg penal e dal dretg da responsabladad.
Entrada en vigur
Il reglament preschent è vegnì approvà da la radunanza generala da la SGIC ils 26 d’avrigl 2019 ed entra en vigur il 1. da matg 2019.
